أخبار وطنية في الذكرى الخامسة للثورة: المدونة لينا بن مهني تطلق صرخة وتقول اليوم يا تونس باش نبكي بالشهقة
في الذكرى الخامسة للثورة، اطلقت المدونة لينا بن مهني صرخة قالت فيها صدمتها من بلاد خانوها وارض باعوها وشبيبة قمعوها وحقوق اغتصبوها وواجبات نسوها. وكتبت لينا تدوينة جاءت كالآتي:
"خمسة سنين وواحد يشرجي في الأمل، يلوّج في شوية منّو باش يكمّل يعيش باش يكمّل يحلم بلّي خير. خمسة سنين وواحد من ضربة لضربة من كف لكف من مصيبة لمصيبة من خيانة لخيانة. خمسة سنين واحد ناسي روحو ومسيّب حياتو...
كلّ عام يتعدّى يقول ان شاء الله الّي بعدو خير وبعد كلّ عام يطلع اشوم من خوه... عندي سنين وانا نصبّح عليكم الصباح و نقلكم الشمس باش تطلع من وراء السحاب ونقلكم خليونا نواصلو وما نفقدوش الامل اما اليوم نحس في روحي مخنوقة.
حفرت لداخل في اعماق اعماقي... بربشت، بعولت شي، كل ما نزيد نبربش كلّ ما نتصدم. نتصدم بحقيقة مرة متاع بلاد خانوها وارض باعوها و شبيبة قمعوها متاع حقوق اغتصبوها وواجبات نسوها...
اليوم مانيش باش نقول لباس خاطر لازمنا نكونو لباس... اليوم مانيش باش نغصّب على روحي ونصوّر على وجهي تبسيمة... اليوم باش نبكي بالشهقة... باش نحكي عالخنقة... اليوم باش نعيّط ونقول يا تونس قوم ولادك وبناتك قمعوهم عذبوهم و قتلوهم... ياتونس اقف لروحك وليهم يا تونس قوم راهو ترابك ما يهون"...
